Maprakanti Sareng PIDHI Bali miwah Fakultas Kedokteran Hewan UNUD, Badan Kerjasama Organisasi Wanita Nyobyahang indik Bhaya miwah Tata Cara Nambakin Panglahlah Virus Rabies
- 02 Maret 2023
- 20:03 WITA
- News
BADUNG,Balitopnews. com - Sajeroning ngadungang program pemerintah provinsi Bali sareng Badan Kerjasama Organisasi Wanita (BKOW) provinsi Bali dan GOW Kabupaten, Ketua BKOW Provinsi Bali Ny. Tjok. Putri Hariyani Ardhana Sukawati nglaksanayang sosialisasi indik baya rabies majeng keselamatan wiadin kesehatan kramane, saantukan kesehatan majanten pinaka parindikan utama sane patut kauratiang nyujur kesehatan sane becik. Sakadi sane kauningin yening rabies pinaka virus sane prasida nglahlah sangkaning cegutan sane kawentenane dahat kaon yening kacegut hewan berdarah panas saha prasida nibenin kramane (zoonosis) saha prasida kaawinang olih wewalungan sakadi sapi, asu, meong, lelawah, kera wiadin bojog). Mawinan patut kauratiang olih samian angga sajeroning nambakin panglimbak virus rabies puniki. Parindikan puniki kabaosang Ketua Badan Kerjasama Organisasi Wanita (BKOW) Provinsi Bali, Ny. Tjok Putri Hariyani Ardhana Sukawati ri kala nglaksanayang sosialisasi baya rabies saha pencegahan ipun, ring Kantor Desa Sibangkaja, Badung, Wraspati (2 Maret 2023)
Sosialisasi sane maprakanti sareng Persatuan Istri Dokter Hewan Indonesia (PIDHI) Provinsi Bali wantah pinaka organisasi wanita sane ngingkupin istri-istri dokter hewan, istri-istri sarjana kedokteran hewan, dokter hewan wanita, wiadin sarjana kedokteran hewan wanita sane karauhin olih kader PKK Desa Sibangkaja.
Ring galahe punika, ngrauhang narawakya I Nyoman Suartha pinaka Dekan Fakultas Kedokteran Hewan Universitas Udayana sane maktayang materi indik "rabies, pencegahan saha penanggulangan ipun". Anggannyane maosang sajeroning miara kawentenan ingon-ingon ipun (pamekas asu wiadin meng) mangda nenten ngawetuang baya majeng krama tiosan, majanten mabuat i raga sareng sami nincapang rasa eling nglaksanayang vaksinasi asu wiadin meng sane kaduenang majeng petugas saking dinas peternakan. Saantukan vaksinasi jagi nyaga wewalungannyane luput saking pinyungkan rabies saha ngandegang mata rantai penularan virus rabies.
Tiosan punika, i raga mangda setata waspada majeng kawentenan anjing gila sane pees utawi air liurnyne madaging virus rabies, saantukan ketahnyane asu punika jagi takut teken surya saha seringan pesu ri kala sampun wengi utawi ri kala sandikala. Napi malih sane patut katangarin ri kala masesanjan ring sandi kala, yening wenten asu sane nampekin patut katangarin pinaka anjing gila sane prasida nyegut cokor saha prasida keni rabies. "Yening wenten kacegut asu, mangda digelis kawangsuhin antuk toya dagingin sabun, saantukan virus rabies kahannyane wantah labil, saha dangan rusak sangkaning sabun wiadin alkohol 70% miwah dangan menguap ring suhu 60 derajat celsius. Tiosan punika, taler mabuat pisan ngruruh penanganan medis saantukan virus rabies jagi inkubasi paling akedik 7 rahina saha prasida kantos wilangan sasih wiadin warsa ", baosnyane.
Asu sane prasida nglahlahin rabies madue tigang fase, minakadi
1. Fase furious (galak) rabies madue caciren minakadi nenten prasida degdeg utawi tenang, nervous, agresif, nenten takut sareng manusa, sira ugi prasida kacegut, hipersalivasi saha reaksi berlebihan.
2. Fase paralisis pinaka fase ngruruh genah mengkeb saking anake rame, takut ring surya, saha ngruruh tatedaan ri kala sampun wengi.
3. Fase dumb (bodoh) ri kala asune ngaseksek utawi kejang saha padem.
Dane taler nlatarang yening caciren anake sane keni rabies, minakadi kesemutan ring angga sarira sane kacegut, peesnyane akeh, takut ring toya, takut surya, nenten seneng ring kawentenan suara, gerakan bola mata 'aneh' wiadin nenten fokus, kejang-kejang, gejala syaraf sane tiosan saha padem.
Kepala Desa Sibangkaja, Ni Nyoman Rai sudani maosang ring desanyane sampun nglaksanayang penanganan rabies saking warsa 2016 sane sampun lintang. Tiosan sosialisasi anggannyane taler nglaksanayang penanganan rabies ring lapangan antuk nyarengang petugas saking dinas peternakan kabupaten. Parindikan puniki kalaksanayang saantukan krama Desa Sibangkaja dahat nguratiang kemanan wiadin kenyamanan samian angga. (Rls/Btnc)
Komentar